අධික කොලෙස්ටරෝල් නිසා ඔබ හදවත් අවදානමකද?
කාර්යබහුල ජීවිත ගත කරන බොහෝ දෙනාගේ ජීවන රටාවන් , ආහාර රටාවන්, පවුල් ඉතිහාසය , වයස , අධික බර සහ ව්‍යායාම වල නිරත නොවීම නිසා ඇතිවන රෝග තත්ත්වයක් ලෙස කොලෙස්ටරෝල් හඳුන්වන්නට පුළුවන්.මේ තත්ත්වය හෘද රෝග සඳහා සෘජු බලපෑමක් ඇති කරන්නක්. හෘද රෝගවලින් ආරක්ෂා වීමට කොලෙස්ටරෝල් වළක්වා ගන්නා ආකාරය සම්බන්ධයෙන් දැනුවත් වෙමු.
කොලෙස්ටරෝල් ඔබේ රුධිරයේ ඇති මේද වර්ගයකි .ඔබේ සෛල සාමාන්‍ය ලෙස ක්‍රියා කිරීමට කොලෙස්ටරෝල් අවශ්‍ය වන අතර එය ඔබේ ශරීරය මගින්ම නිපදවයි. නමුත් ඔබ පරිභෝජනය කරන ආහාර මඟින් ද අමතර කොලෙස්ටරෝල් ප්‍රමාණයක් ඔබේ ශරීරයට ලැබේ.ඔබේ ශරීරයේ අවශ්‍ය ප්‍රමාණයට වඩා කොලෙස්ටරෝල් ඇති විට ඒවා ඔබේ ධමණි තුළ ගොඩනැගීමට පටන් ගනී.මේ තත්ත්වය රුධිර නාල සිහින් වීම ලෙස ද හැඳින්වෙනවා. රුධිර කැටි ගැසීම්, හෘදයාබාධ , ආඝාතය , හෘද සහ රුධිර ප්‍රවාහ ගැටළු වලට මේ තත්ත්වයන් හේතු වේ.
කොලෙස්ටරෝල් ප්‍රධාන වශයෙන් වර්ග දෙකක් ඇත. එනම් ,අඩු ඝනත්ව ලිපොප්‍රෝටීන (LDL) – LDL ඔබේ හෘද රෝග සහ ආඝාත අවදානම වැඩි කරන අතර
අධි-ඝනත්ව ලිපොප්‍රෝටීන (HDL) – HDL යනු හෘද රෝග සහ ආඝාතය ඇතිවීමේ අවදානම අඩු කරන කොලෙස්ටරෝල් වේ.
කොලෙස්ටරෝල් අඩු කරගත හැකි ආකාර
යහපත් ආහාර පුරුදු
අධික ලෙස කොලෙස්ටරෝල් තිබෙන ඔබට පෝෂ්‍යදායී ආහාර වේලකට හුරු වීම කියන්නේ ඔබේ ජීවන රටාවේ කල හැකි වැදගත්ම වෙනස්කම් වලින් එකකි. ක්ෂණික ආහාර , සකසන ලද ආහාර , තෙල් අධික ලෙස යෙදු ආහාර පරිභෝජනය කිරීම පාලනය කර ගුණාත්මක ආහාර ඔබේ ආහාර වේලට එකතු කර ගැනීමට හැකි නම් එය නුවණට හුරු ක්‍රියාවකි. ඔබ මොන තරම් කාර්යබහුල කෙනෙක් වුණත් ඔබේ ආහාර වේලෙහි අඩංගු වන කැලරි ප්‍රමාණය පිළිබඳ සැලකිලිමත් වී හැකිතරම් කැලරි සහිත ආහාර පරිභෝජනය කිරීම අවම කරන්න
තන්තු බහුල ආහාර පරිභෝජනය කරන්න
බොහෝ ශාරීරික ක්‍රියාකාරකම් සඳහා තන්තු උපකාරී වන අතර එය ආහාර දිරවීමේ ක්‍රියාවලිය වැඩි දියුණු කිරීම සඳහා ද දායක වේ.ඉහළ තන්තු සහිත ආහාර වේලක් ඔබේ ශරීරයට සහ රුධිරයට අනවශ්‍ය කොලෙස්ටරෝල් අවශෝෂණය කර ගැනීම වළක්වන බවත් , ද්‍රාව්‍ය තන්තු ග්‍රෑම් 3 ක් මඟින් අහිතකර කොලෙස්ටරෝල් 18% කින් පමණ අඩු කරන බවත් පර්යේෂණ මගින් පෙන්වා දී තිබෙනවා .ඒ අනුව දිනකට තන්තු ග්‍රෑම් 25 – 30 ලබා ගැනීම කෙරෙහි ඔබ අවධානය යොමු කරනවා නම් වඩාත් සුදුසු බවත් පෝෂණවේදීන් පෙන්වා දෙයි.
ඔබේ ආතති මට්ටම කළමනාකරණය කරගන්න
මානසික ආතතිය හෘද රෝග සඳහා ප්‍රධාන හේතුවක් ලෙස සැලකේ. කාර්යබහුල ජීවන රටාව නිසා නිසි ආහාර වේලක් අනුගමනය නොකිරීම ,ව්‍යායාම නොකිරීම සහ දැඩි ආතතියට පත්වීම ඔබේ ශරීර සෞඛ්‍ය වෙත සෘජුවම බලපායු. ඕනෑවට වඩා කනස්සල්ලට පත් වීම මානසික ආතතියට හේතු වන අතර එය ඔබේ ශරීරයේ කොලෙස්ටරෝල් මට්ටම වැඩි කරයි. ඔබේ ආතති මට්ටම කළමනාකරණය කර ගැනීමට ව්‍යායාම කියන්නේ ඉතාම හොඳ උපක්‍රමයකි. ඊට අමතරව යෝගා අභ්‍යාස වල නිරත වීම සහ භාවනා ක්‍රම වලට යොමු වීමත් ඔබට කළ හැකියි.
අනිවාර්යයෙන්ම ව්‍යායාම කරන්න
ඔබේ ශරීරයේ ක්‍රියාකාරී බව වැඩි කිරීමට සහ හෘද රෝග අවදානම අඩු කර ගැනීමට නම් ව්‍යායාම වල නිරත වීම ඔබ අනිවාර්යයෙන්ම කළ යුතුයි.අවම වශයෙන් දිනකට පැයක්වත් ව්‍යායාම වල නිරත වීම , ඇවිදීම හෝ දිවීම වැනි ක්‍රියාකාරකම් වල නිරත වීම ඔබට කළ හැකියි. ඔබ දැනටමත් අධික කොලෙස්ටරෝල් සහිත තත්ත්වයකින් පෙළෙනවා නම් ඔබේ වෛද්‍යවරයා හමුවී උපදෙස් ලබා ගන්න.
බර අඩු කරගන්න
මේ කාරණාව ඉහත කාරණාවටම සම්බන්ධ වේ.විශේෂයෙන්ම ශරීරයේ අනවශ්‍ය ලෙස මේදය තැන්පත් වී ඇති පුද්ගලයන්ට හෘද වාහිනී රෝග , මානසික අවපීඩනය , දියවැඩියාව , අක්මා සහ වකුගඩු රෝග ඇතුළු බොහෝ රෝග තත්ත්වයන් ඇතිවිය හැකියි. මේ නිසා ආහාර පාලනය සහ ව්‍යායාම කිරීම යන කාරණා දෙක පිළිබඳවම ඔබ විශේෂයෙන් සැලකිලිමත් විය යුතුය.
සම්පූර්ණ ධාන්‍ය පරිභෝජනය කරන්න
සම්පූර්ණ ධාන්‍ය බී විටමින් සහ ද්‍රාව්‍ය තන්තු වලින් පොහොසත් වෙන අතර ඒවා මගින් අහිතකර කොලෙස්ටරෝල් මට්ටම අඩු කර හෘද රෝග ඇතිවීමේ අවදානමද අඩු කරයි.පර්යේෂණ මගින් පෙන්වා දී ඇති ආකාරයට දිනකට ධාන්‍ය වර්ග එකක් හෝ දෙකක් ආහාරයට ගැනීම මගින් හෘද රෝග ඇතිවීමේ අවදානම ආසන්න වශයෙන් 10% – 20% අඩු කළ හැකි බවයි.
මෙවැනි ක්‍රමවලින් ඔබ කොලෙස්ටරෝල් පාලනය කර ගැනීම ඔබේ සෞඛ්‍ය නගා සිටුවන්නකි. එසේ නමුත් කොලෙස්ටරෝල් ඉහළ මට්ටමකට පත් වී ඔබ හෘද රෝග අවදානමක නම් ප්‍රතිකාර ලබා ගැනීම මොහොතක්වත් ප්‍රමාද කළ යුතු නැත.
හදවත් රෝගවලින් වැළකෙන්න – ඔබේ හදවත රැක ගන්න!
හදවත් රෝග සම්බන්ධ ඕනෑම ගැටළුවකදී ඩර්ඩන්ස් හෘද රෝග ඒකකය ඔබ සමඟයි.
වැඩි විස්තර සඳහා 077 1067 748 හෝ 070 6788 455 අමතන්න
